個案分享・12月, 2018

近日WhatsApp推出貼圖功能，引起一股貼圖熱潮。除左網上流傳各式各樣嘅貼圖包，好多網民都紛紛推出自製貼圖，輕輕搜尋一下就搵到好多自製貼圖教學。而民建聯同陳凱欣都和應潮流推出個人化貼圖拉票，點解企業唔把握呢個機會推出自家貼圖，借機宣傳自己呢？

相比起一般廣告，企業貼圖化被動為主動，吸引用家自發下載和使用貼圖，從而「主動」宣傳企業信息。呢種宣傳手法有別一般硬銷式廣告嘅突兀，用家甚至可能察覺唔到自己幫企業做緊宣傳添。

貼圖被應用喺日常對話中，某啲包含日常話語嘅貼圖更會一用再用， 可想而知曝光率會有幾高。除此之外，企業貼圖更大大拉近企業同用家之間嘅距離，即使係一啲唔常見既品牌，都可以透過貼圖變得「親民化」，從而增加用家同企業嘅接觸頻率。

正因為WhatsApp貼圖提倡嘅係靈活性同趣味性，所以貼圖基本上會避免同金錢或者利益扯上關係。故此，用家接收企業貼圖時唔會因為其商業性而拒絕使用。

首先要留意嘅係唔好為左突出品牌，而將商標放到好大，一嚟顯得突兀，二嚟會引起用家反感。其次，選用較常用嘅字眼、表情或動作能夠提升用戶的使用頻率。

企業最忠實嘅支持者非公司員工莫屬，貼圖嘅發放當然應該由員工開始，由家人到朋友，一傳十，十傳百， 好快就可以將貼圖包傳開去。除此之外，網上都有好多唔同嘅貼圖下載平台，只要將貼圖上傳到平台，用家就可以自行下載同使用。

利用貼圖宣傳效益大，企業點解唔考慮自製番一套WhatsApp貼圖，借住呢股貼圖潮宣傳自己呢？適逢聖誕，更加係推出節慶貼圖嘅好時機，加上聖誕祝賀語，好過互發「長輩圖」！